في يوم من أيام شهر أبريل سنة ١٨٨٢، كان واحد من موظفي إشارات السكة الحديد قاعد في كشكه على طريق القطر بين إسكندرية وطنطا، ودوره كان تسجيل حركة القطارات وتشغيل الإشارات علشان ما تحصلش أي حوادث بينها لو اتقابلوا على نفس القضبان في نفس الوقت.
يومها هجمت عليه مجموعة من رجالة العصابات، وكان معاهم سلاح ناري وشايلين عصيان وفي إيدهم حجارة. ورغم إن الموظف قاومهم في البداية، لكنه بعد ما ضربوه، وضربوا نار في الهوا كمان لتهديده، اضطر إنه ينفذ لهم طلبهم، واللي هو مجرد تغيير الإشارة الخاصة بالقطر الجاي بعد شويه.
يادوب تغيير الإشارة للون الأحمر كان هو كل اللي عايزه رجالة العصابات علشان يسرقوا القطر، ويختفوا بعدها تماما، وده بعد ما حبسوا الموظف في كشكه لساعات، لغاية ما زملاؤه اكتشفوا الأمر وقت تغيير الوردية.
الحادثة دي كانت جزء من حوادث أكبر حصلت في الربع الأخير من القرن ال ١٩، واللي هي سرقات بتحصل في خطوط السكة الحديد من خلال التلاعب بالتكنولوجيا، وأهمها نظام الإشارات الموجود قدامكم دلوقتي.
أنظمة الإشارة كانت بالفعل شغالة من اللحظة الأولى لانطلاقة السكة الحديد، والهدف منها هو إرسال التعليمات لسواق القطر، وخصوصا لو فيه قطر تاني لازم يتجنبه، أو أي ظروف تانية.
بس جمب استخدام التكنولوجيا دي في تنظيم القطارات، كان فيه استخدام تاني ليها، لا بيحصل من مشغّلي القطر، ولا من ركابه، إنما بيتم على إيد عصابات متخصصة في سرقة الحاويات من القطارات. العصابات دي ظهرت وقتها كجزء من حركة أكبر في مصر، ضمت معاهم مجموعات من البدو والفلاحين المعدمين، بل وكمان ظباط صغيرين من البوليس.
ورغم الطفرة اللي حققتها السكة الحديد بإنها سهّلت الحركة، وسرّعت معدل التجارة، وساهمت في مراكمة ثروات البعض من خلال تصدير قطننا لمصانع لانكشاير في إنجلترا، إلا إن جزء كبير من الشعب المصري في الحقبة دي ما جناش أي ثمرة من ثمار الطفرة الاقتصادية دي، بل بالعكس زادت معاناته.
وبداية من سنة ١٨٧٦، لما لجنة الدين اللي أنشأها الاحتلال تولّت إدارة أمور المالية المصرية، اتأزمت الظروف الاقتصادية لقطاعات واسعة من الشعب، وده بسبب التركيز على سداد ديون مصر وفوائدها بدل الاستثمار في البنى التحتية أو تقديم الخدمات للناس. وعلشان كده قررت المجموعات المهمشة وقتها إنها تعيد توزيع الثروة بنفسها باستخدام طرق تانية، اللي كان منها بالأساس سرقة حاويات السكة الحديد، وده كان بعد فشل الثورة العرابية.
واتضح مع الوقت إن السرقة دي ما كانتش عشوائية أو بسيطة، إنما كانت بتحتاج لتخطيط وجهد منظم، وكمان وعي بتكنولوجيا السكة الحديد، لأن العقبة الرئيسية اللي كانت بتواجه العصابات هي محاولة إبطاء القطر لسرعة مناسبة يبقى سهل معاها ركوبه وسرقته، وده ما كانش ممكن يحصل بدون تدخّلهم إلا قبل أو بعد المحطات، علشان نزول أو صعود الركاب. ومن هنا لجأت العصابات دي لحلول بعضها بدائي زي إنهم يحطوا حجارة في مسار القطر علشان يضطر يقف، أو أساليب متقدمة زي التلاعب بالإشارات، وده من خلال سيطرتهم على محطات الإشارات وتغيير الإشارة الخضرا إلى اللون الأحمر علشان القطر يقف (زي الحادثة بتاعتنا هنا)، أو حتى إنهم يخفوا الإشارة الأصلية ويعلقوا ضوء أحمر مكانها، ودي خدعة كان السواقين أصحاب الخبرة بيكشفوها، لكنها كانت بتنجح وتنطلي على بعضهم في أوقات تانية كتيرة.
وقدام الخبرة اللي أبدتها المجموعات الهامشية دي في السرقة، قررت الحكومة والاحتلال الانجليزي تغيير نظام الإشارات كله في السكة الحديد، واستبداله بنظام أحدث. والنظام الجديد ده، اللي اتعرف بنظام وستنجاهوس، كان بيسمح للموظف وهو في المحطة الرئيسية إنه يسجل حركة القطورات ويتحكم في الإشارات عن بعد، من غير ما يضطر إنه يكون في مناطق معزولة.
الحقيقة تكنولوجيا القطر كانت ورا انقلاب حياة المهمشين دول، بل يمكن همشتهم أكتر، لكنهم مع ذلك قدروا يأثروا فيها من غير ما يكونوا بالضرورة على دراية بده.
في النهاية، كل اللي كانت عايزاه المجموعات الهامشية هو جزء من الثروة اللي نتجت عن التكنولوجيا، لكنها ما كانتش مهتمة بتغيير النظام المستفيد منها بشكل جذري، ولا حتى عطّلت القطورات أو قطعت خطوط السكة الحديد زي ما حصل بعد كده في ثورة ١٩، ولأهداف أكبر بكتير.
المصادر :
- Usurpers of Technology: Train Robbery and Theft in Egypt, 1876–1904