يا وابور قول لي رايح على فين
يا وابور قول لي وسافرت منين
يا وابور قول لي
عمال تجرى قبلي وبحري
تنزل وادي تطلع كوبري
حوِّد مره وبعدين دُغري
ما تقول يا وابور رايح على فين
ده اللي غنّاه محمد عبد الوهاب وهو بيتعجب من أمر القطار أو “الوابور” زي ما كان المصريين بيسموه لأنه كان بيمشي بالبخار في البداية.
من يوم ما ظهر القطار وهو ليه تأثير واضح على مخيلة المصريين، وده خلاه يظهر في الأدب والسينما والأغاني المصرية. فهنلاقي كتير من القصايد اتكتبت عن القطار واستخدمته كاستعارة للتعبير عن مشاعر كتيرة، زي ما هنلاقي روايات كتير بتدور أحداثها في القطار وعالمه، زي رواية “سائق القطار” لنجيب محفوظ وغيرها من الروايات والقصص.
القطار شق لنفسه طريق مهم في الأغاني المصرية، فهنلاقي أغنية “يا وابور قول لي رايح على فين” لمحمد عبد الوهاب اللي بدأنا بيها، وهنلاقي كمان أغنية فريد الأطرش “يا مقبّل يوم وليلة”، وأغاني كتير تانية زي أغنية عفاف راضي “يا وابور الساعة ١٢” وأغنية محمد رشدي “قطر الحياة”. كمان القطار لقاله مكان في أغاني الأطفال من خلال أغنية عبد المنعم مدبولي وهدي سلطان “توت توت قطر صغنطوط”، اللي اترسمت فيها صورة بلاغية لأول تروماي وصل لمحطة نومه وقالت: “ده أول قطر ينام في بيوت”. وفضل القطار مستمر في مسيرته في الأغاني الحديثة كمان، زي أغنية حمزة نمرة “القطر” اللي بيوصف فيها القطر: “ما بتستناش يا قطر… اللي ما جاش يا قطر… ولا فيك مكان يركب حد ببلاش… وأهو فات معاك العمر”، اللي بتعكس إزاي المصريين شايفين القطر كاستعارة عن الحركة السريعة المستمرة اللي لازم الإنسان يحاول يواكبها. وفيه كمان تعبيرات زي “فاته قطر الجواز” أو “فاته القطر”، اللي بتعني إن الشخص ما قدرش يلحق حلم أو هدف كان عايز يوصله.
أما في السينما المصرية، فالقطاركان ليه دور محوري. كلنا عندنا حكايات وتصورات عن القطار من السينما بس. القطار كان موجود في السينما سواء كان الفيلم كله بيحصل داخل القطار وعالمه زي فيلم “المنسي” لشريف عرفة ومن بطولة عادل إمام ويسرا، أو فيلم “بطل من ورق” لنادر جلال وبطولة ممدوح عبد العليم وآثار الحكيم. وفي أوقات تانية، القطار كان بيلعب دور البطولة في مشاهد مهمة في أفلام تانية، زي فيلم “دعاء الكروان” لهنري بركات وبطولة أحمد مظهر وفاتن حمامة، وفيلم “الهروب” لعاطف الطيب، بطولة أحمد زكي وهالة صدقي. ومش ممكن ننسى يوسف شاهين اللي قدّم وجوه مختلفة للقطار في أفلامه، فهنلاقي تجسيد لعالم القطر في فيلم “باب الحديد” بطولة فريد شوقي وهند رستم، وكمان قدم لنا عربية الدرجة التالتة في قطار الصعيد “الترسو” في فيلمه “انت حبيبي” بطولة فريد الأطرش وشادية، وكمان شاهين قدم لنا القطار في مشهد رئيسي في فيلم “الأرض”، وقدم كمان فيلم “سيدة القطار” بطولة ليلي مراد.
نقدر نقول إن القطار أثر في وجدان المصريين وفنهم بشكل كبير، ولسه تأثيره مستمر ومتجدد، ولسه كمان بنتساءل مع عبد الوهاب:
ما تقول يا وابور رايح على فين
يا وابور قول لي
قربت غريب وبعدت قريب
وجمعت حبيب على شمل حبيب
والقرب نصيب والبعد نصيب
ما تقول يا وابور رايح على فين