في بلدة ديفون اللي بتطل على القنال الإنجليزي، وفي واحد من أيام شهر مارس في الربع الأخير من القرن ال١٨، كان نيوكمان بيحاول تركيب آلته الجديدة علشان مساعدة صديقه السباك في واحدة من مهامه الصعبة في الوقت ده، وهي إزاحة المياه من مناجم النحاس المنتشرة وقتها. كانت الآلة بتحوّل طاقة البخار المتصاعد من المياه المغلية لحركة منتظمة ترفع المياه من للأرض. نيوكمان ما ابتداش في آلته من العدم، ولكنه بناها على نظريات واختراعات سابقة قبل مية سنة حوالين البخار وضغطه وتحويله لحركة ممكن استخدامها. لكن المثير في اختراعه هو البساطة والانتظام، لأنه ولأول مرة ممكن تحويل البخار لحركة منتظمة وثابتة ممكن توظيفها. الإضافة دي بالرغم من إنها كانت بسيطة، لكنها كانت ثورية، وآذنت بميلاد فجر جديد اسمه الثورة الصناعية. كان الهدف الأساسي من الاختراع ده في حينه هو نزح المياه من المناجم، وكان بيحتاج كمية كبيرة من الفحم، علشان كده ما كانش فيه مكان أنسب من نيوكاسل لتطبيق الفكرة دي، وده لأنه بتتجمع فيها مناجم الفحم، وكلها بتحتاج لنزح المياه، واللي كان لغاية الوقت ده الأحصنة هي المسؤولة عنه. وبمجرد ما نيوكمان اخترع آلته تحولت المنطقة لغابة من محركات نيوكمان اللي قادرة على عمل ١٢ دورة في الدقيقة الواحدة علشان تنزح أطنان المياه من المناجم دي.
في شبكة المناجم حوالين نيوكاسل اللي أصبحت الموطن الطبيعي للمحرك البخاري، انتشر الفحم وكان أرخص من أكل حصان. كانت المناطق دي هي مهد الثورة الصناعية بدرجة كبيرة، مش بس بسبب الفحم، إنما لكونها المسرح الأول لتجربة المحرك البخاري الجديد، ومكان بتعمل فيه القاطرات بالبخار بعد كده. ولكنها لغاية لحظتها ما كانتش بأهمية مناطق الغابات في أوروبا اللي منها كانت بتيجي المادة الأهم في الحقبة دي وهي الخشب. قبل الحديد والفحم كان الخشب هو مصدر طاقة وحركة وخامة البناء الأولى في السفن والبيوت واستخدامات تانية. كان الاعتماد الأساسي ده على الخشب هو السبب الرئيسي ورا استنزافه، وبالتالي التعجيل بالثورة الصناعية نتيجة النقص الحاد في الخشب. لكن في الحقبة دي كان الخشب اللي هو مادة طبيعية غير مصنعة بتضفي ملمح عضوي وحقيقي في العلاقة بين الإنسان وما حوله، فكان الخشب هو الوقود، بجانب المياه والرياح اللي همّا الأساس في توليد الطاقة الحركية. الملمح ده هيختفي تدريجيا لما تتحول الطاقة والخامات ناحية الفحم والحديد، وتتحول علاقة الإنسان بالطبيعة تماما نتيجة للتغير ده.
رجوعا لنيوكاسل ومناجمها، كانت المهمة الأولى للمحرك البخاري هي نزح المياه من المناجم، وما كانش استهلاكه الكبير للفحم مشكلة في المنطقة دي، ولكن ظهر مع الوقت استخدام تاني للفحم في مصانع النسيج؛ كانت المصانع دي بتتبني جنب القنوات المائية لاستخدام طاقة المياه في تحريك المغازل والأنوال، ولكن المشكلة إنه حركة المياه موسمية بالأساس، علشان كده جات الفكرة بإن المحرك يرفع المياه اللي تم استخدامها، علشان يعاد استخدامها مرة تناية بدون انتظار هطول أمطار جديدة. فضل استخدام المحرك محصور بالأساس في الأعمال البسيطة دي لسبب أساسي إن الحركة الوحيدة اللي يقدر يقوم بيها هي حركة رأسية، من غير ما يقدر يقوم بأي حركة تانية، ولكن ده هيتغير فجأة مع الاسم اللي عرفه العالم بعد كده كأحد أهم المخترعين في التاريخ: جيمس وات.
كان جيمس وات بيشتغل في مجال الطاقة البخارية وكانت شركته بتبيع محرك نيوكمان لأصحاب المناجم، ولكن مع الوقت تشبع السوق وما كانش فيه طلب كبير على المحركات دي. علشان كده شركته طلبت منه إنه يفكر في استخدامات جديدة للمحرك، وكانت النتيجة تطويره للمحرك الأصلي في إنه خلاه يقدر ينتج حركة دائرية، وكمان قلل استخدام الفحم، ولكنه ما زال محرك كبير صعب نقله. كان إنتاج حركة دائرية منتظمة من طاقة مش بتعتمد بالأساس على الطبيعة – زي الرياح أو المياه – بيُعتَبَر ثورة حقيقية. لأول مرة بيتخطى الإنسان الطبيعة بعد ما كان بيجاريها ويحاول الاصطفاف معاها. قبل الوقت ده ما كانش ممكن إن القارب يكون أسرع من المياه تحته، أو يمشي في اتجاه عكس الريح حواليه، ولكن ده اتغير للأبد. ومن الوقت ده فصاعد هيتغلب الإنسان على الطبيعة بأشكال مختلفة، والبخار هيمكّنه من طي الأرض والزمن طيّاً، أو في تعبير معاصري المرحلة دي: “اندثار الحدود الزمنية والمكانية.”
- الاختراع ده فجّر الثورة الصناعية، واجتاحت حمى البخار كل الصناعات وعلى راسها صناعة النسيج. أدت الحركة الدائرية المنتظمة لقفزة في الإنتاج وتطوُّر كبير في المعدات المستخدمة وكذلك العمال، فانتهت الحِرَفية بالمفهوم القديم، وظهر التقسيم المتخصص للعمال على الآلة. نتيجة لكل ده كان الفحم هو المحرك الأهم لكل المشهد، ولكن فضل نقله يعتمد بشكل كبير على عربيات بتجرّها الخيول، لغاية ما جه دور مخترع تالت هو إيفنز، اللي قام بتكثيف المحرك البخاري وتحسين أداؤه بشكل كبير، ثم تصغير حجمه، فأصبح من الممكن ولأول مرة نقله بسهولة على عربية واستخدامه في النقل. كان الموطن الطبيعي للاختراع ده هي شبكة مناجم الفحم في نيوكاسل. نتيجة لوفرة الفحم والاحتياج ليه وتطور المحرك نشأت أول شبكة سكة حديد تربط المناجم بالنهر القريب علشان يبقى ممكن نقل الفحم بسرعة، وتم استخدام الطاقة البخارية لأول مرة لنقل البضايع والفحم، وبالتالي البشر.
- كان النقل في بريطانيا في الوقت ده متطور بالنسبة لباقي أوروبا. حتى قبل السكة الحديد، اعتمد بالأساس على استخدام العربيات اللي بتجرّها الخيول بسرعة ١٠ ميل في الساعة وبشكل منتظم وطرق ممهدة، ولكن كانت الطبيعة سواء في حدود الخيول أو تضاريس الأرض ومسافتها هي المحدد الأول للرحلة. أما الانتقال للسكك الحديدية البخارية ما كانش سلس أو منطقي زي ما بنتخيل دلوقت، ولكن الصدفة لعبت دور كمان في ده، لأن الحروب النابليونية في بداية القرن أثّرت على وفرة الخيول وبقى تمنها غالي وصعب شرائها. لكن الأهم إن غذاء الخيول المعتمد على الذرة ارتفع تمنه جدا نتيجة فرض جمارك عليه، وده علشان يحمي الإقطاعيين الزراعيين ومصالحهم بالأساس. نتيجة لده كان البخار والفحم المتوافر همّا الخيار الأنسب للنقل في اللحظة دي، ومن هنا بدأت السكة الحديد رحلتها في تغيير شكل التنقّل في العالم.
- الناس انقسموا في رد فعلهم على التغيير الجذري ده في طريقة حياتهم، لأن العربيات اللي بتجرّها الخيول كانت بتمثّل للبعض الارتباط بالطبيعة والإحساس بالرحلة وتفاصيلها، في حين كان القطر يُعتبر إلغاء لكل العلاقة الحميمة دي. من ناحية تانية شاف البعض إن السكك الحديدية فرصة ذهبية للتنقل والتجارة والسفر لأبعد المسافات، بالإضافة إنها مثّلت الانتظام والاتساق والتحمّل على عكس قوة الحيوان. مع الوقت الصراع اتحسم تماما لصالح السكة الحديد، وأصبح السفر بالعربيات اللي بتجرها الخيول هواية الأغنيا، علشان القطر وحده يتربع على عرش التنقل، لغاية ما يظهر له منافسين آخرين بعد قرن من الزمان.
المصادر
- Wolfgang Schivelbusch – The Railway Journey_ The Industrialization of Time and Space in the Nineteenth Century-University of California Press (2014)