الملك فؤاد الأول كان عنده رغبة كبيرة في جمع الإحصائيات والمعروضات والصور علشان يعمل تاريخ تفصيلي يعكس التطور اللي حصل في السكك الحديدية والتلغرافات والتليفونات في مصر. وفي عالم مليان بالقطارات السريعة والأفكار الجديدة، كانت فيه فكرة بدأت في سنة ١٨٨٥ لما اجتمع مجموعة من رجال السكك الحديدية من كل أنحاء أوروبا (ما عدا إنجلترا) في مدينة بروكسل علشان يحتفلوا بمرور خمسين سنة على إنشاء أول خط حديدي في أوروبا. الاجتماع ده كان خاص جدًا، ومنه اتولدت جمعية جديدة اسمها “اللجنة الدولية لمؤتمرات السكك الحديدية”، واختاروا مدينة بروكسل كمقر ليها. كان هدف الجمعية دي إنها تساعد في تطور السكك الحديدية عن طريق عقد مؤتمرات دولية في العواصم والمدن الرئيسية، علشان يتجمع خبراء السكك الحديدية من كل أنحاء العالم ويتبادلوا الأفكار والخبرات بخصوص كيفية تحسينها وجعلها أسرع وأحسن وأكتر أمانًا.

وفي سنة ١٩٣٣، جه الدور على القاهرة علشان تستضيف الدورة ال ١٢ للمؤتمر الدولي للسكك الحديدية. فتلاقت رغبة الملك في جمع المعروضات مع التحضيرات الخاصة بالمؤتمر، وقرر مجلس إدارة السكك الحديدية في يناير ١٩٣٢ البدء في إنشاء متحف خاص بالسكك الحديدية والتلغرافات والتليفونات في مصر، بهدف افتتاحه في المؤتمر الدولي للسكك الحديدية في يناير ١٩٣٣.

بدأت عملية إنشاء مباني المتحف في ٢٦ أكتوبر ١٩٣٢، وكان عبارة عن جناح أضيف لمباني المحطة الرئيسية في رمسيس، واتصمم بشكل يتماشى مع النمط المعماري لباقي المباني. تم طلاء الأثاث كله باللون الأخضر اللي هو لون الدولة، واستخدام الصلب اللي ما بيتأثرش بالصدا في أجزاء كتيرة من المتحف. وبلغ عدد المعروضات والنماذج حوالي ٦٠٠، ده بجانب البيانات الفنية والإحصائيات الكتيرة. وفريق المتحف اغتنم الفرصة علشان يستعيروا بعض النماذج القيمة من مختلف السكك الحديدية حوالين العالم، علشان يقارنوا وضع السكك الحديدية المصرية بنظيراتها العالمية.

فضل متحف السكك الحديد مفتوح للزيارة لحد ما اتقفل في ٢٠١٠ بغرض تطويره، واتفتح تاني للجمهور في مارس ٢٠١٦.

دلوقتي المتحف بيضم بجانب معروضاته مكتبة مفتوحة للزيارة والاطلاع. المكتبة دي فيها عدد كبير من المجلدات والكتب التاريخية والفنية والإحصائية عن النقل والسكك الحديدية في مصر، كمان فيها مجموعة من الكتب والروايات العامة. المكتبة دي بتعتبر مصدر ثري جدًا للباحثين والمؤرخين والهواة اللي عايزين يستكشفوا الجوانب التقنية والثقافية والتاريخية للسكك الحديدية في مصر.

في المكتبة هنلاقي مجموعة من المنشورات التاريخية اللي منها سجلات تاريخية متعلقة بتطوير نظام السكك الحديدية، ومجلات دورية،و تقارير سنوية، ومنشورات من الهيئة القومية لسكك حديد مصر والمؤسسات ذات الصلة، اللي بتوضح التطورات والتحديات والمعالم البارزة في قطاع السكك الحديدية. كمان هنلاقي المخططات والرسومات الفنية لمحطات السكك الحديدية المهمة، والقطارات، والآلات البخارية، خصوصًا اللي بترجع للحقبة الاستعمارية وأوائل القرن العشرين. فيه كمان مجموعة من الكتب والمجلات اللي بتغطي مختلف جوانب تاريخ السكك الحديدية، والهندسة، والاقتصاد، وسياسات النقل، مع التركيز على السياق المصري والإقليمي.

ومن أهم الموارد اللي متاحة في المكتبة هي الأعداد التاريخية لمجلة سكك حديد مصر من سنة ١٩٣٠. وفيه كمان أعداد من “الوقائع المصرية” ومجموعة من الميزانيات التاريخية لسكك حديد مصر.

المصادر:

– المتحف انشائه ووصف عام عنه، مجلة سكك حديد الحكومة المصرية، مستر سلوتر، السنة الثانية، العدد الأول، يناير ١٩٣٣.
– موقع سكك حديد مصر، https://www.enr.gov.eg/Ar/Album.aspx?ID=1